بلغة البشتو – بيان تعزية ومناشدة من الهيئة بشأن زلزال أفغانستان

بسم الله الرحمن الرحيم

د نبي کریم ﷺ د انصارو نړیوالې ادارې له لورې د افغانستان د زلزلې په اړه د تسلیت او غوښتنې اعلاميه

الحمد لله چې د صبر کوونکو مرتبې لوړوي، ابتلاء د مؤمنانو د درجې د لوړوالي او د ګناهونو د بښلو سبب ګرځوي.
درود او سلام دې وي زموږ پر سيدنا محمد صلی الله عليه وسلم، د هغه پر کورنۍ او ټولو اصحابو، هغه چې ويلي يې دي:
«د مؤمنانو د مينې، رحم او شفقت مثال د يوه بدن په څېر دی، چې که د هغه يو غړی درد وکړي، نو ټول بدن په بې‌خوبۍ او تبه کې ورسره ګډ شي» [متفق عليه].

د نبي کریم ﷺ د انصارو نړیواله اداره په ژور غم او تسلیمۍ سره هغه دردونکې خبرونه ترلاسه کړل چې د افغانستان اسلامي امارت د ختیځو ولایتونو په سیمو کې د دوشنبې په ورځ، ۹ ربیع الاول ۱۴۴۷هـ، چې د ۲۰۲۵م د سپتمبر له لومړۍ نېټې سره سمون خوري، د سختې زلزلې له امله سلګونه تنه شهیدان، زرګونه ټپیان، ستر مالي او انساني زیانونه او زرګونه کورنۍ بې‌کوره شوې دي. دا په داسې حال کې چې د افغانستان ولس له څو لسیزو جګړو او یرغل وروسته لا ډېر ملاتړ او ثبات ته اړتیا لري.

موږ د دغو سختو شېبو په شریکولو سره د زړه له کومي خپل تعزیت له امیرالمؤمنین شیخ هبة الله اخندزاده د اسلامي امارت مشرتابه او د ټولو قربانیانو کورنیو ته وړاندې کوو. الله تعالی ته دعا کوو چې شهیدان د خپل پراخ رحمت په سیوري کې ومني، ټپیانو ته عاجله شفا ور وبښي او د غمجنو زړونه تسل او سکون ورکړي.

دغه ډول پېښې یوازې عادي پیښې نه دي، بلکې د ټول امت لپاره د شفقت او همکارۍ ازموینه ده. رسول الله ﷺ فرمایلي دي: «مؤمن د مؤمن لپاره د ودانۍ په څېر دی چې یو بل پیاوړی کوي» او همدارنګه یې ویلي دي: «چا چې د یو مؤمن له ستونزو څخه یوه ستونزه لرې کړه، الله تعالی به د قیامت په ورځ له هغه نه یوه لویه ستونزه لرې کړي» [رواه مسلم].

نو ځکه د نبي کریم ﷺ د انصارو نړیواله اداره ټینګار کوي چې د مرستې او اغاثې فریضه یو شرعي حکم، یو اخوي مسؤولیت او یو انساني امانت دی، چې د ټولې نړۍ پر مسلمانانو لازمي دی، په ځانګړې توګه پر خیریه بنسټونو، اغاثي ادارو، شتمنو سوداګرو او د رسنیو وسایلو چې باید د افغانانو پر ستونزو رڼا واچوي.

د افغان ولس عاجلې اړتیاوې اوس ډېرې سترې دي، له هغې جملې: د ژوندي پاتې شویو لپاره د خوراکي موادو، اوبو، خېمو او کمبلو برابرول، د ټپیانو درملنه او روغتونونو ته د درملو او طبي کارکوونکو برابرول، د کورونو رغول او د متضررو کورنیو لپاره د امن کورونو جوړول، او د یتیمانو او کونډو پالنه چې له سترو عبادتونو څخه ده. دغې زلزلې سلګونه یتیمان پاتې کړي چې ژر تر ژره د سرپرستۍ اړتیا لري.

موږ له الله تعالی نه غوښتنه کوو چې امت د خپل مسؤولیت په ترسره کولو کې بریالی کړي، مخلصو کسانو ته توفیق ورکړي څو د خپلو وروڼو په مرستې کې هڅې وکړي، بېشکه چې هغه د دې کار څښتن او قادر دی.

د نبي کریم ﷺ د انصارو نړیواله اداره
۱۱ ربیع الاول ۱۴۴۷هـ
۳ سپتمبر ۲۰۲۵م